Nii kùà'á Ndióxì ìxaká'nu nà yùví ra, iindàáva Ndióxì íyo, rà kúvi rà ndixa (Juan 17:3). Rà Ká'nu kúvira nùú túkúndi'ina, ra miíra ìxavà'a túkúndi'i ñà'a, ra táxira ñà tíáku túkúndi'iyó. Mitú'unra íyo ichí kasaká'nuyó (Daniel 7:18; Apocalipsis 4:11).
¿Yóó kúvi Ndióxì?
Kìví Ndióxì ra, yósoñá nùú tù'unra ñà original yachin 7.000 ICHÍ
JEHOVÁ kúvi kìví Ndióxì
Tá ká'ànna xà'á Jehová á ká'ànna xí'inra, ká'ànna TÁTA, NDIÓXÌ á YUVÁ
Kìvíra. Miíra kúvi rà ká'àn su'va: “Yù'ù kúvi Jehová. Saá naníyù” (Isaías 42:8). Nùú Biblia ra, kìví Ndióxì vàxiña yachin ùxà mil ndíta. Ndí, kùà'á Biblia ñà távána ra, kìndiaana kìvíra ra, tìsóna Táta á Señor. Ndióxí ra, kúnìra ná kitá'ankún xí'inra ñàkán kúnìtura ná kà'ànkún kìvíra tá ká'ànkún xí'inra (Salmo 105:1).
Inkaka ñà xíniñú'una. Tá ká'àn Biblia xà'á Jehová ká'ànña Ndióxì, rà íyo túkúndi'i ndieè, ra ìxavá'a túkúndi'i ñà'a, Yuvá, Táta, á rà xá'ndiachíñu iníí kúvi. Nùú Biblia ra, vàxi tù'un ñà nìkà'àn savana xí'inra, ra nìkà'ànna xí'inra Señor á Táta ndí, tòó'oní nìkà'ànna xí'inra, ra nìkà'àntuna Jehová xí'inra (Daniel 9:4).
¿Nìsa íyora? Iin tàchíva kúvira ra kǔví kuniyó-ra (Juan 4:24). Ká'àn Biblia chi, ndìà nii iinna tǎ'án kuniñà'a (Juan 1:18). Ká'àntuña ñà kúsìí-inira xí'in ñà và'a ñà íxayó ra, vǎ'a kúnira xí'in ñà vǎ'a (Salmo 78:40, 41; Proverbios 27:11).
Ñà và'aní-inira. Kúnìra ná kuyachin túkúndi'i nà yùví nùúra, ndìà ndíáka ñuu kèena á ndìà ndíáka nà yùví kúvina (Hechos 10:34, 35). Saátu kúndá'vi-inira xínira yóó, ndátúnra ná ndandikó-iniyó, ndieéní kú'vì-inira xínira yóó, ra nina ñà ndixa ká'ànra (Éxodo 34:6, 7). Ndí, íyo kùmí ñà'a ñà ká'nuníka ñà ná'àra nùúyó ñà và'aní-inira.
Ndieè. Ndióxì rà kúú mií túkúndi'i ndieè kúvira. Ñàkán và'a sáxìnura túkúndi'i ñà ká'ànra asara (Génesis 17:1).
Ñà ndíchi. Ni kǒó inkaka nà ndíchi iin tá kù'va íyo Ndióxì. Ñàkán kúvi ñà ká'àn Biblia ñà, mitú'unra kúvi rà ndíchi (Romanos 16:27).
Ñà ndàkú. Nina chiñu ndàkú tíinra túkúndi'i tiempo. Ñà và'aní kúvi túkúndi'i ñà íxara, ra ndìà nii iin ichí kǒé íxara ñà vǎ'a (Deuteronomio 32:4).
Kúnìníra yóó. Ká'àn Biblia chi, kú'vì-inira xínira yóó, ndí, iníí saára kúvi ñà yó'o chi (1 Juan 4:8). Túkúndi'i chiñu tíin Ndióxì, ná'àñà nùúyó ñà ndixa kú'vì-inira xínira yóó, ra túkúndi'i chiñu tíinra chíndieétá'anña xí'inyó.
Và'aní kítá'an Ndióxì xí'in nà yùví. Ndióxì rà íyo nùú ñà ndiví, Yuváyó kúvira (Mateo 6:9). Átu kándíxayó-ra, kuviva kitá'an và'ayó xí'inra ra nduuyó amigora (Salmo 25:14). Kúnìvara ná kà'ànyó xí'inra, ra ndatú'unyó xí'inra ndíá ñà ndó'oyó saá chi, ndí'ì-inira xà'áyó (Santiago 4:8; 1 Pedro 5:7).
¿Á iinva kúvi Ndióxì xí'in rà Jesucristo?
Sǔví Ndióxì kúvi rà Jesús. Mitú'unva kúvi rà Jesús, ra suvi Ndióxì ìxavà'a-ña'á. Ñàkán kúvi ñà ká'àn Biblia ñà kúvira Sè'e Ndióxì (Juan 20:31). Jehová, ìxavà'ara rá Jesús, Sè'e nùúra kúvira. Ra tá nìyà'a tiempo xìniñú'ura-ra ñà asavà'ra túkúndi'i ñà'a, ñà íyo nùú ñà ndiví xí'in ñà íyo nùú Ñu'ún yó'o (Proverbios 8:30, 31; Colosenses 1:15, 16).
Nii iin ichí kǒé nìkà'àn rà Jesús ñà kúvira Ndióxì. Ñàyó'o kúvi ñà nìkà'ànra: “Vàxiyù kà'ànyù xà'á Ndióxì, saá chi, suvira tì'ví yù'ù vàxiyù” (Juan 7:29). Iin ichí tá ndátú'unra xí'in iin ña'á ñá kándíxaña'á nìkà'ànra xà'á Jehová ñà kúvira Yuvára rà saátu Yuvá nà kán, ra kuvitura Ndióxìra ra, Ndióxì nà kán (Juan 20:17). Ra tá nìxì'ì rà Jesús, Jehová sàndátiakuña'á ra ndàkundú'úra xììnra, ra tàxitu Ndióxì ndieè nda'ára (Mateo 28:18; Hechos 2:32, 33).
Rà Jesucristo kuvi chindieétá'an xí'inkún ñà kuyachinkún Ndióxì
Kìxira nùú Ñu'ún yó'o ñà sanà'àra yóó nìsa íyo Yuvára. Suvi Jehová kúvi rà nìkà'àn ñà yó'o xà'á rà Jesús, kàchira: “Rà yó'o kúvi Sè'eyù, rà kú'vì-iniyù xíniyù. Kunisò'ondó ñà ká'ànra” (Marcos 9:7). Rà Jesús kúvi rà xínì và'aka yóó kúvi Ndióxì. Suvi rà níkà'ànva ñà yó'o: “Kǒó nii iin nà xínì yóó kúvi Yuváyù, saá chi, mitú'un rà kúvi Sè'era xínì, ra xínìtu túkúndi'iva nà kúnìra ndatú'unra xí'in” (Lucas 10:22).
Ndánà'à và'ara nìsa íyo Ndióxì. Rà Jesús ndànà'à và'ara nìsa íyo Yuvára ñàkán nìkà'ànra ñà yó'o: “Rà xìni yù'ù, xìnituna Yuváyù” (Juan 14:9). Xí'in túkúndi'i chiñu ñà ìxara ra xí'in túkúndi'i tù'un ñà nìkà'ànra chìndieétá'anra xí'in nà yùví ñà kuyachinna Ndióxì, saá chi, nìnà'àra nùúna ñà kúnìva Ndióxìna. Tù'un yó'o nìkà'àn rà Jesús: “Yù'ù kúvi ichí, yù'ù kúvi ñà ndixa, yù'ù kúvi rà taxi ñà kutiakundó. Nii iinna kǔví kuyachinna Yuváyù átu kǒé ndíkùnna yù'ù” (Juan 14:6). Saátu nìkà'anra: “Nà ndinu'u-ini ndásaká'nu Yuváyù, ndasaká'nuna-ra xí'in tàchí ììra ra xí'in ñà ndixa. Saá chi, nà yó'o xíka Yuváyù ndándukúra ñà ndasaká'nuna-ra” (Juan 4:23). ¡Ndakani-inikún xà'á ñà yó'o! Jehová xíkara ndándukúra yó'ò, saá chi, kúnìkún kundàà-inikún ñà ndixa xà'ára.
__________
__________
