Rà Jesús sàná'àra nà kàndíxaña'á ñà kà'ànna xí'in Ndióxì su'va: “Yuvándù rà íin nùú ñà ndiví, ná nduu ìi kìvíkún. Ná ka'ndiachíñukún. Ná koo ñà kúnìkún, iin tá kù'và íyo ñà kúnìkún nùú ñà ndiví iin saá ná kootu nùú ñu'ún” (Mateo 6:9, 10). ¿Ndíá ñà và'a asa gobierno Ndióxì? ¿Ndiá ñà và'a xà íxara vichin? ¿Nìchun xíniñú'u kà'ànyó xí'in Ndióxì ñà ná ka'ndiachíñura nùú ñayǔví yó'o?
Rà Jesús kúvi rà Rey rà nìkà'àn Ndióxì ka'ndiachíñu
Lucas 1:31-33: “Chindú'ukún kìvíra ñà kunaníra Jesús. Rà ká'nu kuura ra kunanítura Sè'e Ndióxì rà ká'nu. Ra, Ndióxì Jehová taxi ndìàyú nda'ára ñà kundú'úra ka'ndiachíñura nùú xà'ndiachíñu rà David yuvára, ra ka'ndiachíñura nùú nà ve'e rá Jacob ndisaá tiempo. Ra ñà ka'ndiachíñura ndǐ'i xà'áña”.
Ñà ka'ndiachíñu Ndióxì kùvi ñà ndíáyà'vika ñà ndàtù'ún rà Jesús xà'á
Mateo 9:35: “Ra saá ra, nìxà'àn rà Jesús túkúndi'i ñuu ná'nu xí'in ñuu válí. Xá'ànra ra, ndí'vira ve'e nùú ndátakana ká'ànndosóra xà'á ñà ka'ndiachíñu Ndióxì, sánduvà'atura nà ndieé ndó'o kùà'á nùú kùè'è, ra saátu nà kú'vì íxa túkúndi'i nùú kùè'è”.
Rà Jesús nìkà'ànra xí'in nà kàndíxaña'á ndíá ñà'a kúvi ñà kunina ra saá kundàà-inina ñà xà nìnumí ka'ndiachíñu Ndióxì
Mateo 24:7: “Katá'an iin ñuu xí'in inka ñuu, ra koo sòko, ra kootu ñà táan iin xiyo ra ndìà inka xiyo”.
Nà kándíxa rà Jesús ndátú'unna xí'in inkana iníí kúvi nùú Ñu'ún yó'o
Mateo 24:14: “Tù'un và'a xà'á ñà ka'ndiachíñu Ndióxì ndatú'unna xà'áña xí'in inkana iníí saá nùú ñu'ún ñàkán kundàà-inina xà'áña ra, saáví ndi'i-xà'á ñayǔví ñà vǎ'a”.
