Ñà ká'àn Biblia
Kùà'á ichí ká'án Biblia ñà kúvi rà Jesús “Sè'e Ndióxì” (Juan 1:49). Ñàyó'o kúnì kachiña ñà mií Ndióxì táxi ñà tíáku iinna saá chi, ìxavà'ara-na, saá íyovaña, Ndióxì ìxavà'a rà Jesús (Salmo 36:9; Revelación [Apocalipsis] 4:11). Ndí, kǒé ká'àn Biblia ñà íyo sè'e Ndióxì iin tá kù'va xíyò sè'e nà yùví.
Ká'àntu Biblia ñà kúvitu nà ángel “sè'e Ndióxì” (Job 1:6). Sáná'àtuña ñà xìkuu rà Adán, tìàa rà nìxìyo nùú và'a, “sè'e Ndióxì” (Lucas 3:38). Ndí, ká'àn Biblia ñà kúvi rà Jesús Sè'e Ndióxì, rà ndíáyà'vika nùúra, saá chi, mitú'unra kúvi rà nùú và'a ìxavà'ara.
¿Á nùú ñà ndiví nìxìyo rà Jesús tá kúmàníka kixira nùú Ñu'ún yó'o?
Saá íyovaña. Tá kúmàníka ñà kakura nùú ñayǔví yó'o ñà kuura iin yùví. rà Jesús xìkuura iin ángel á espíritu nùú ñà ndiví. Miíra nìkà'ànva ñà kèera nùú ñà ndiví ra kìxira nùú Ñu'ún yó'o (Juan 6:38; 8:23).
Rà Jesús kúvi rà nùú và'a ìxavà'a Ndióxì. Ñàyó'o kúvi ñà ká'àn Biblia xà'ára:
- Miíra kúvi rà nùú và'a kùvà'a (Colosenses 1:15).
- Miíra kúvi rà nùú và'a ìxavà'a Ndióxì (Revelación 3:14).
Rà Jesús, sàxínùra tù'un ñà nìkà'an xà'ára, tù'un ñà nìkà'an xà'á iinra rà xà íyova tiempo yatá và'a (Miqueas 5:2; Mateo 2:4-6).
¿Ndíá ñà ìxaa rà Jesús nùú ñà ndiví tá kúnìka ñà kixira nùú Ñu'ún yó'o?
Iin chiñu ñà ká'nuní nìxìkuu miíra nùú ñà ndiví. Rà Jesús nìkà'ànra xà'á chiñu ká'nu yó'o tá nìkà'ànra xí'in Ndióxì su'va: “Yuváyù Ndióxì, taxi tukukún ná nduká'nuyù [...] iin tá kù'va nìxìyoyù tá xìndú'úyù xí'inkún tá kúmàníka ñà koo ñayǔví yó'o” (Juan 17:5).
Chìndieétá'anra xí'in Yuvára ñà kuvà'a túkúndi'i inkaka ñà'a. Rà Jesús ra, ìxachíñura xí'in Ndióxì (Proverbios 8:30). Xà'á rà Jesús, ká'àn Biblia su'va: “Xà'á miíra kùvà'a túkúndi'i inkaka ñà'a nùú ñà ndiví ra saátu nùú ñu'ún” (Colosenses 1:16).
Ndióxì xìniñù'ura rà Jesús ñà và'a ìxavà'ara túkùndi'ika ñà'a, tà kúu nà ángel, nà kǔví kuniyó, ra saátu túkúndi'i ñà'a ñà và'a xíto'niyó nùú (Revelación 5:11). Rà Jesús ìxachíñura xí'in Ndióxì iin tá kù'va íxachíñu iin rà íxavà'a ve'e xí'in iin rà arquitecto. Rá arquitecto ìxavà'a plano ve'e, ra saá ra, inka rà káchiñu xí'inra íxavà'a ve'e.
Tù'un xìkuura. Tá ká'àn Biblia xà'á rà Jesús ñà nìxìyora nùú ñà ndiví tá kúnìka ñà kixira nùú Ñu'ún yó'o, ká'ànña ñà naníra “tù'un” (Juan 1:1). Ñàyó'o kúnì kachiña ñà xìniñú'u Ndióxì rà Jesús ñà sayà'ara tù'unra nda'á inka nà ángel.
Saátu sàyá'a rà Jesús tù'un Yuvára nda'á nà yùví. Va sana xìniñú'u Jehová rà Jesús ñà và'a nìkà'ànra xí'in rà Adán ra xí'in ñá Eva nùú ñu'ún nduvi nùú chìndú'úra-na, ñà xìnaní Edén (Génesis 2:16, 17). Va sanatu rà Jesús xìkuu rà ángel rà yóso núu nùú nà ñuu Israel tá nìxìkana nùú yukú ñà íchi, ra sana xìkuutura rà xíniñù'u kandíxa và'ana tiempo saá (Éxodo 23:20-23).1
__________
Inkaka ñà kà'án xà'á ñàyó'o:
__________
__________
Inkaka ñà kà'án xà'á ñàyó'o:
__________
1 Sǔví mitú'un rà kúvi Tú'un, rà Jesús, níxíniñú'u Ndióxì ñà và'a kà'ànra xí'in inkana. Jehová ra, xìniñú'utura inkaka nà ángel ñà và'a tàxira Ley-ra nda'á nà ñuu Israel (Hechos 7:53; Gálatas 3:19; Hebreos 2:2, 3).
__________
__________
Kànaña nùú jw.org.
