Ñà ká'àn Biblia
Tù'un Ndióxì ká'àn chi, kǒé kúnì Ndióxì ñà ná kuyàkùàyó xí'in ñà vǎ'a ñà kúnì kùñùyó (1 Tesalonicenses 4:3). Ká'àn Tù'un Ndióxì chi, ñà vǎ'a yó'o kúviña tá kíxìna xí'in tá'anna ra sùví ìína kúvina ra ni sùví ñá sí'ina kúvi nà kíxì xí'inna, saátu tá kíxi tìàa xí'in tìàa ra ña'á xí'in ña'á, inkatuña kúviña tá kíxi xí'in tá'anna ra ni tǎ'an tanda'ána.
¿Nìchun kúviña xà'ndia Ndióxì chiñu ñà tanda'ána?
- Ndióxì xà'ndia chiñu ñà tanda'ána. Rà yó'o kúvira sàtánda'á nà ùvì yùví nà nìxìyo nùú và'a (Génesis 2:22-24). Nǐkùnira ñà koo xí'in tá'anna ra tǎnda'ána.
- Ndióxì kúvi rà xínì ndíá ñà kúvi ñà và'a ñà kundikùnyó. Xà'ndiara chiñu ñà ná tanda'á tìàa xí'in ña'á saá chi, saá koo xí'in tá'anna túkúndi'i tiempo. Kùnira ñà koo và'a túkúndi'ina, tìàa xí'in ñá sí'ira, ra saátu sè'ena. Ndakani-iniún xà'á ñà yó'o: Ñà và'a ndachitá'anyó vìtu ra nduunú mesa xíniñú'u ka'viyó ñà ká'àn tutu ñà vàxi xí'innú nùú sàatayó-nú, saá chi, rá íxavà'anú xínì nìsa ndachitá'anyó vìtu yó'o. Saátu átu kúnìyó sìí koo ini nà ve'eyò, xíiñú'u kundikùnyó ñà ká'àn Ndióxì. Túkúndi'i tiempo kee và'avayó tá ná kandíxayó-ra (Isaías 48:17, 18).
Átu kúnìyó ndachitá'anyó vìtu ñà nduunú mesa, xíniñù'u kundikùnyó tutu nùú vàxi ñà ká'àn rà ìxavà'anú. Átu kúnìyó sìí koo ini nà ve'eyó xíniñú'u kundikùnyó ñà ká'àn Ndióxì. - Kixiva tùndó'o nùúna tá ná kùsùnna xí'in tá'anna ra tǎ'an tanda'ána. Íyo kùà'á nùú ñà kuvi kundo'ona, nà sì'i kuvi kèe sè'ena tá kúáchikana, kuvitu sávikùn kuè'è xí'in tá'anna ra kuvitu ndandikó-inina ra kusuchítu-inina. 1
- Ndióxì ra, sàní'ira iin ñà và'a nda'á nà yùvi: ñà kuvi koo sè'ena tá ná kùsùnna xí'in tá'anna. Ñà và'aní kúvi ñàyó'o. Ra ndìáyà'viníva ñà tíákuyó nùúra. Ñàkán kùnìra toó'o ná kooyó ra ná koo sè'eyó xí'in nà nìtinda'á xí'inyó. Saá kúvi ñà kándíxayó chiñu xà'ndia Ndióxì kìví nùúví (Hebreos 13:4).
¿Á kuvi koo xí'in tá'anna ñàkán kuvi kundàà-inina á và'ana ra saáví tanda'ána?
Ñà kuvi sìí kundee xí'in tá'anna kǒé xíniñù'uví xi'na koo xí'in tà'anna ra saá kunina á tanda'ána à và'aka ndakoo tá'anna. Saá chi, ñà và'a koo xí'in tá'anna ndisaá tiempo xíniñú'u ùvì saána chikàà-ini ra chikààtuna ndieè ñà asachíñuna xí'in tá'anna ra kuchiñuna xí'in kùàchi ñà kixi nùúna. 2 Ra kuchiñuvana tá ná tanda'á và'ana nùú nà chíñu (Mateo 19:6; Romanos 13:1).
¿Nìsa kuvi koo nà nìtanda'á xí'in tá'anna ndisaá tiempo?
Xà kúndàà-iniyó ñà kakuva kùàchi xí'in tá'anna. Ndí, kuviva kundee sìína tá ná kandíxana consejo ñà ká'àn Biblia. Ná kà'ànyó xà'á sava consejo yó'o:
- Xi'na kundì'ì-inindó xà'á nà nìtanda'á xí'inndó (1 Corintios 7:3-5; Filipenses 2:3, 4).
- Chikààndó ndieè ñà asatoó'o tá'anndó ra kù'vìka-inindó kuni tá'anndó (Efesios 5:25, 33).
- Ndakani-inindó xà'á ñà kà'àndó chi koto yà'a yu'úndó xí'in tá'anndó (Proverbios 12:18).
- Kundatunndó xí'in tà'anndó átu kǒe kúsìí-inindó xí'in ñà íxaana ra asaká'nutu-inindó xà'á tá'anndó (Colosenses 3:13, 14).
__________
Kànaña nùú jw.org.
