Danielle, kúvi iin ñá testigo Jehová ñá íyo ñuu Sudáfrica, ra ndàni'iñá iin leka1 ñà ndàkoona nùú kíyà'vi café. Ini leka yó'o ndíkàà iin cartera xí'in xù'ún ra ndíkààtu tarjeta ñà táxi nà banco ñà sátána ñà'a. Xà'á ñà kúnì ñá Danielle ndanì'iñá nà xíin kuentaña, ndàndukúñá ini leka á ndanì'iñá ndíá ñuu íyona ra, á kuvitu ndanì'iñá número teléfono ñà kà'ànñá xí'inna, ndí mitú'un kìví iin tìàa ndàni'iñá. Nìndakatù'unñá banco ndíá tìàa kúvira, ndí nǐkuvi ndanì'iñá-ra. Saá ra, xìto'nikañá ini leka ra ndàni'iñá iin receta ñà táxi nà doctor, ra nìkà'ànñá xí'in número ñà vàxi nùú receta, ra ñá ndàkuiin nìkà'àn xí'inñá ñà sayà'añá número ñá Danielle nda'á tìàa rà ndándukúñá.
Ndàyú'u-ini rà tìàa kán ñà nìkà'ànna xí'inra xí'in teléfono nùú nìxà'ànra kutátanra, ra nìkà'ànna xí'inra ñà ndàni'ina lekara, ra kúnìna ndataxina-ña nda'ára. Tá nìxà'ànra ndaki'inra-ña, índichi rà yuvá ñá Danielle xí'inñá. Ra ndàtù'unna xí'inra nìchun kúvi ñà nìxìkana ndàndukúna-ra. Nìkà'ànna xí'inra chi, xà'à ñà kúúna testigo Jehová, kúnìna kundikùnna ñà kà'àn Biblia, ñàkán kúvi ñà toó'onína ra, kǔvi ndaki'inna ñà'a inkana kù'ùn xí'inna (Hebreos 13:18).
Kìvì saá, tá nìya'a lo'o hora, rà tìàa yó'o tì'víra2 iin mensaje nda'á ñá Danielle xí'in yuváñá ra, nìkà'ànra xí'innna ñà tíxà'vina xà'á ñà màní ñà ìxaana xí'inra. Tù'un yó'o tìàara tì'víra nda'ána: “Tíxà'viníndó xà'á ñà ndàndukú và'andó yù'ú. Và'aní kùniì ñà xìniì ndó'ò. Ndaka'ánví xà'ándó ñà và'a nìxìyo inindó xí'ìn, ñàkán kúnìì taxiì lo'o xù'ún nda'ándó ñà và'a kua'nuka chiñu Ndióxì. Kúndàà-iniì ñà kùà'ání ñà íxaandó ra chíkààníndó ndieè ñà saxìnundó chiñu ñà tàxi Ndóxì nda'ándó. Nà yùví và'ava kúvindó ñàkán kùni ñá Danielle sandandikóñá leka nda'í. Ñàkán tíxà'vindó ra, Ndióxì nà chikàà ndieè xí'inndó ñà sáxínundó chiñura”.
Tá nìyà'a lo'o yòó, rà tìàa kán ra, ndàkà'ànra xí'in yuvá ñá Danielle, ra ndàtù'únra xí'inra iin ñà ndò'ora. Rà nìxà'àn sata kúvira, ra ndàni'ira iin leka lo'o kándú'ú nùú ñu'ún. Ndàndukúra ñá xíin kuentaña, ra tá ndàni'ira-ñá ndàtaxira leka lo'o nda'áñá, ndàtù'únra xí'inñá nìchun kúvi ñà ìxaara saá. Nìkà'ànra xí'inñá chi, ndàtaxira-ña nda'áñá chi saá ìxaatuna xí'inra tá yàchì lo'o. Ñàyó'o kúvi tù'un ñà nìkà'ànra: “Iin ñà màní lo'o ñà íxaana xí'inyó kuvi chindieétá'an xí'inyó ñà asaayó iin ñà màní xí'in inkana, ra saá kúvi ñà íyo và'a túkúndi'ivayó”.
__________
1 Bolsa.
2 Chìnda'ára.
__________
Kànaña nùú jw.org.
__________
1 Bolsa.
2 Chìnda'ára.
__________
Kànaña nùú jw.org.
