Ñà ká'àn Biblia
Ká'ànva Biblia nìchun kúviña kuvi kandíxayó ñà íyo Ndióxì. Ká'àn ta'anvaña ñà kuvi kandíxa và'ayó Ndióxì átu ná ndaki'inxìníyó xí'in ñà sáná'àña, và'akava ñàyó'o nùú ñá kándixa kùà'á nà yùví, chi ñà távána xìní miìvana kándíxana (1 Juan 5:20; Romanos 12:1). Ná kà'ànyó xà'á níchun kúviña kuvi kandíxayó ñà íyo Ndióxì.
- Nùú ñayǔví nùú ndéeyó, tìàní1 và'a íyo, íyo nà yùví, íyo kití, kùà'á ñà'a ñà tíáku, ra chí nìnu nùú ndiví íyo kùà'ánítu ñà ká'nda, ra viíní ká'ndaña kùà'ànña, xí'in ñàyó'o ndìkùn kúndàà-iniyó ñà íyo iinna ìxavà'a túkúndi'iña. Tù'un yó'o ká'àn Biblia: “Túkúndi'i ve'e, íyo iinna ìxavà'aña, ndí, Ndióxì kúvi rà ìxavà'a túkúndi'i ñà'a” (Hebreos 3:4). Nii kǒe kùà'á ká'àn tù'un nùú versículo yó'o, ndí, kùà'á nà yùví ra, nii kùà'á kùìyà sàku'ana escuela kándíxavana-ña.2
- Yóó nà yúví ra, kúnìníyó kundàà-iniyó nìchun kúvi ñà tíákuyó á nìchun kúvi ñà vàxiyó ñayǔví yó'o, ra átu ná kǔndàà-iniyó ra, kǒé và'a kuniyó. Xíniñú'uní kundàà-iniyó xà'á ñàyó'o, ra ndíáyà'viníka ñàyó'o nùú ñà kuxiyó á inkaka ñà'a ñà kúnìyó, inka ñà kítá'an xí'in ñàyó'o ñà xíniñú'utuyó kúvi ñà ná kundàà-iniyó xà'á Ndióxì ra ndakuniyó-ra ra ndasaká'nuyó-ra (Mateo 5:3; Revelación [Apocalipsis] 4:11). Ra átu ndixa kúnìyó kundàà-iniyó xà'á nìchun kúvi ñà tíákuyó ra kúnìtuyó ndakuniyó Ndióxì, saá ra kúnì kachiña ñà ndixa íyova Ndióxì, rà kú'vì-ini xíni yóó, rà ìxavà'a yóó, rà chìndú'ú nùú nìmàyó ñà kùnìyó kundàà-iniyó xà'ára ra sìí kundeeyó (Mateo 4:4).
- Kùà'á ñà'a ñà nìkà'àn Biblia kuu, ndàxìnu túkúndi'ivaña tá nìyà'a kùà'ání kùìyà ñà tìàana-ña. Ñà ndàxìnu ñàyó'o kúvi ñà ná'à nùúyó ñà íyo iin rà ká'nuní, rà tàxi tù'un yó'o nda'á nà tìàaña (2 Pedro 1:21).
Íyo kùà'á nùú ñà ndíchi ñà kùndàà-ini nà tìàa Biblia xà'á tá kúmàníka kùà'ání kùìyà ñà kixàà tiempo ñà kundàà-ini nà cientifico xà'áña. Tá kúu sava nà nìxìyo tiempo yatá, kàndixana ñà kǒé ítakaa mií ñayǔví yó'o, chi sàtá iin elefante, iin jabalí, iin sìndìkì á inkaka kití índichiña. Ndí, síínva nìxìyo tù'un ñà nìkà'àn Biblia tiempo saá, kàchiña ñà kàtakaa miíva Ndióxì ñayǔví yó'o, ra kǒó ñà'a ñà ndísoña'á (Job 26:7). Saátu nìkà'ànña ñà tá kù'va íyo iin tìùvì á iin ko'ndo saá íyo ñayǔví (Isaías 40:22). Và'a kùndàà-inina ñà saá ìyo ñayǔví yó'o tiempo kán, saá chi, va suvi Ndióxì nìkà'àn xí'invana ñà saá íyovaña.- Biblia ra, và'aní ndákuiinña xà'á kùà'ání ñà ndákatù'ún nà kǒé kándíxa Ndióxì, tá kúu ñàyó'o: Átu rà và'a kúvi Ndióxì ra mitú'unra íyoní ndieè, ¿nìchun kúviña íyoní ñà vǎ'a ra ndó'oní-iniyó? ¿Nìchun kùà'á kùàchi sákaku veñù'u? (Tito 1:16.) Tù'un ñà ká'àn Biblia xà'á ñàyó'o kuvi chindeétá'an xí'inkún ñà kuvi kandíxakún ñà ndixa íyova Ndióxì.
__________
1 Ndieéní.
2 Tá kúu rà astrónomo Allan Sandage, nìkà'ànra xà'á ñà'a ñà xìnira ká'nda nùú ñà ndiví, ra kàchira ñàyó'o: “Ndákanixìníì ñà nǐkuvi tùvi mií túkúndi'i ñà'a yó'o, ra tìàní vií ká'ndaña. Xíniñú'u koo iinna chìndú'ú vìí túkúndi'i ñà'a yó'o. Ndixa kǔndáá-iniì nìsa íyo Ndióxì, ndí, xà'á ñà íyora kúviña kúndàà-iniyó miì kàna túkúndi'i ñà'a”.
__________
Kànaña nùú jw.org.
