Ñà sándì'i iniyó, vàxiña saá chi, íyo iin ñà ndó'oyó, iin ñà ù'vìní. Xìnìyó ra kíxá'áña táváña ñà naní hormona ra kíxá'á kùñuyó ndákutúña xi'inña. Xà'á ñà yó'o kíxá'á kamaka kándíta nímàyó ra ndakuka kùà'àn nììyó ini tùchìyó, ra kǒé và'aka ndáki'in tàchìyó, ra kíxá'átu nduu xìi kùñuyó. Nà ndí'ìní ini kúviyó ñàkán ndó'oyó saá. Tá xà kùtáxìn iniyó ra, ndúvà'a iniyó ra kǒé kamaka kándita nímàyó ra và'aní kúniyó.
VÀ'AVA ÑÀ LO'O NDÌ'I INIYÓ NDÍ, VǍ'A ÑÀ NDIEÉNÍ SÁNDÌ'IÑA INIYÓ
Ñà ndí'i iniyó, vàxiña saá chi, kùñuyó ra kúndàà iniña ñà íyo iin ñà ìyo nùúyó á iin chiñu ñà ù'vìní nùúyó. Ñà yó'o kíxá'áña xìnìyó. Ñà và'ava kúvi ñà lo'o ndì'i iniyó saá chi chíndieétá'anña xí'inyó ñà kama tiinyó iin chiñu á kama kandayó. Ñàkán và'ava ñà ndì'i iniyó saá chi kamaka káchiñuyó ra nì'iyó iin ñà'a ñà kúnìyó, tá kúu tá tíinyó iin examen, tá ndúkúyó chiñu á tá kúnìyó kuchiñuyó xí'in deporte.
Ndí, tá ndieéní sándì'iña iniyó, ra kǒé kama kútáxìn iniyó kuvi asaña kùè'è xí'inyó. Tá ndieéní sándì'iña iniyó kuvi kixá'á kù'viyó, kixá'á kusuchí iniyó, ra kixá'átu sanayó. Kixá'áyó kuuyó iin ndìà tá kù'va íyo inka nà yùví ra sǔví tá íyo miíyó, ra kǒé và'atu kùniyó xí'in inkana. Iin nà ndieéní ndí'ì ini ra ndìàkùà sásanañana ra kuvi kixá'ána asana sava ñà vǎ'a. Kuvi kusuchíní inina ra ndìàkùà ndakani inina ñà và'aka ka'nína miína.
Và'ani síínva ndó'o iin iinna xí'in ñà sándì'iña inina ndí, kuvi asaña sava kùè'è xí'inna.
