Xíniñú'u kundàà-iniyó ñà ndixa xà'á sava ñà'a ñà ndíáyà'vi, saá chi, átu kǒó ra, ìyo kuviyó. Tá kúu ndákanixìní xà'á: ¿nìsa xíkùn kùè'è?
Xìna'á ra, kǒó nii iinna kúndàà-ini xà'á nìsa íxa iin kùè'è ñà xíkùnña, ra ñàkán kùà'á millón nà yúví xà'níña. Ra tá nìyà'aví tiempo saáví kùndàà-ini nà científico, nà ndíchi, ñà ndixa xà'á ñà yó'o. Kùndàà-inina chi, ñà'a válí pá'a, tá kúu ñà naní bacteria, ra saátu ñà naní virus kúvi ñà sáyà'a kùè'è nda'á inkana. Ra xà'á ñà kùndàà-inina ñà ndixa xà'á ñà yó'o kúvi ñà và'a íxatátanna nà ndieé ndó'o xí'in kùà'á nùú kùè'è, ra saá kúvi ñà và'aka íyo nà yùví ra kùà'áka kùìyà tíákuna.
Ndí, ¿á íyo inkaka ñà ndíáyà'vi kundàà-iniyó xà'á? ¿Á và'anìka kookún átu ná kundàà-inikún ñà ndixa xà'á ñà vàxi yó'o?
- ¿Yóó kúvi Ndióxì?
- ¿Yóó kúvi rà Jesucristo?
- ¿Ndíá kù'va ka'ndiachíñu Ndióxì?
- ¿Nìsaví koo tiempo vàxi?
Kùà'á millón nà yùví xà kúndàà-ini ñà ndixa xà'á ñà ndákatù'ún yó'o, ra vichin và'aníka íyona. Ra và'aníka koovakún átu ná kundàà-inikún xà'áña.
¿Á ÍYOVÍ ÑÀ NDIXA ÑÀ XÍNIÑÚ'U KUNDÀÀ-INIYÓ XÀ'Á?
Va sana kuvi kà'ànkún á kuviví kundàà-iniyó ñà ndixa xà'á iin ñà'a. Saá chi, vichin ra, ndíchiní íyo ñà kundàà-iniyó á ñà ndixa ká'àn iinna, á ñà vatiáva kúviña. ¿Nìchun íyo ñà yó'o saá?
Kùà'á nà yùví kǒé kándíxakana ñà ká'àn nà chíñu, nà káchíñu empresa á nà ká'àn xà'á iin ñà'a, tá kúu Internet. Ndíchiní íyo ñà kundàà-inina á ñà ndixa kúvi ñà ká'àn iinna, á ñà ndákanixìnívana kúviña, á lo'o ndixa kúviña ra lo'o vatiáva kúviña. Ñàkán kúvi ñà kǒé ndíá-inina ñà ká'àn iinna ra saátu kǒé ndíá-inina-ña nii ndixa kúviña.
Ra nii saá íyoña ra, kuviva ndanì'ikún ndíá ñà kúvi ñà ndixa ñà ndíáyà'vika ñà xíniñú'uní kundàà-inikún xà'á. ¿Nìsa kuvi kundàà-inikún xà'áña? Iin tá kù'va íxakún ñà kúndàà-inikún xà'á iin ñà kǒé ndíáyà'vi và'a, saáva asakún ñà ndanì'ikún ñà ndixa xà'á ñà ndíáyà'vika.
¿NÌSA KUVI NDANÌ'IKÚN ÑÀ NDIXA?
Túkúndi'i kìí ndándukúyó ñà ndixa. Tá kúu, ñá Jessica ra, xíniñú'u koto và'aña á kǒé vàxi cacahuate (maní) xí'in ingrediente iin ñà'a ñà satañá. Su'va káchiñá: “Kǔví kaxi ñá sè'eyù cacahuate chi íxaaña kùè'è xí'inñá ra, kama xá'ní-ña'áña. Ñàkán xi'na ká'viyù sàtá iin iin ñà'a ñà satayù á kǒó cacahuate ñú'u xí'inña. Ra saátu ká'vi và'ayù xà'á ñà'a ñà sátayù, ra ndìàkùà ká'ànyù xí'in empresa nùú kúvà'a ñà yó'o ñàkán kundàà-iniyù á kǒó cacahuate níxiyo yachin xí'inña ra, kǒó nii lo'o chíin pá'aña níkòyò xí'inña. Saá ndándukúkayù nà xínìka xà'á empresa yó'o á xínìna ñà và'aní káchíñuna ñà kúvà'a ñà'a ñà íxìkóna yáxiyó”.
Va sana kǒé ndándukúkún sava ñà ndíáyà'vi yó'o túkúndi'i kìí, ndí kuvi asakún iin tá kù'va ìxa ñà Jessica ñà và'a ndandukúkún ñà ndixa xà'á ñà ndákatù'ún ñà ndíáyà'vi và'aka:
- Ndandukúkún xà'áña.
- Ndandukúkún inkaka ñà'a xà'áña.
- Ki'inkún kuenta xí'in página nùú ndándukúkún xà'áña á nina ñà ndixa ká'ànña.
Ñà yó'o kuvi chindieétá'an xí'inkún ñà ndanì'ikún ñà ndákuiin xà'á ñà ndákatù'ún ñà ndíáyà'vi và'aka. Ná kà'ànkayó xà'áña.
MITÚ'UN KÚVI LIBRO ÑÀ KÁ'ÀN ÑÀ NDIXA
Ñà và'a kundàà-ini ñá Jessica ñà ndixa xà'á ñà ndákatù'ún ñà ndíáyà'vika, ìxañá iin tá kù'va ìxañá ñà kundàà-iniñá á kǒó cacahuate ñú'u xí'in iin ñà'a ñà sátañá. Su'va káchiñá: “Kà'vi và'ayù xà'áña ra ndàndukú và'ayù xà'áña, ra saá ndànì'iyù ñà ndixa ñà sánà'à Biblia”. Kùà'á millón nà yùví ìxa iin tá kù'va íxa ñá Jessica ra kùndàà-inina ndíá ñà ká'àn Biblia xà'á iin ñà kúnìyó kundàà-iniyó, tá kúu ñà vàxi yó'o:
- ¿Nìchun vàxiyó ñayǔví yó'o?
- ¿Ndíá míí kùà'àn nà nìxì'ì?
- ¿Nìchun ndó'oní-iniyó?
- ¿Ndíá ñà asa Ndióxì ñà sandi'ira xà'á tùndo'ó ñà íyo?
- ¿Nìsa kuvi kundee sìíyó xí'in nà ve'eyó?
Saátu yó'ò, kuvi ndanì'ikún ñà ndixa xà'á ñà yó'o, ra saátu xà'á inkaka ñà'a átu ná ka'vikún Biblia ra ndandukúkakún xà'áña nùú página ñà Intermet www.jw.org.
